MUKEGULU VHA ḒO FHAṰELWA NNḒU SA TSHUMELO YO ḒISWAHO NGA THULAMELA IMBIZO
Mukegulu wa mushai Vho Elizabeth Maphaha (89) vho takala na zwikunwane musi Meyara wa Masipala wa Thulamela, Cllr Athongozwoḓivha Sarah Rambuḓa vha tshi vha dalela ngei muḓini wavho ngei Ṱhohoyanḓou Block G Ext.
Sa tshipida tsha Imbizo yo farwaho ngei Lufule 2, kha wadi 17, nga Ḽavhuṋa, 05 Fulwi 2025, Vho Meyara na vhurumelwa vho thoma nga u luvha kha Thovhele Vho Gole Mphaphuli ngei musanda Mbilwi, u bva afho vha kona u livha muḓini wa mukegulu Vho Maphaha u vha ḓzivhadza uri Masipala wa Thulamela u do vha fhaṱela nnḓu na u vha sia na zwifhiwa zwa zwiḽiwa na zwifuko.
Madalo aya o dzhenelwa nga Vhamusanda Vho Mphephu Mphaphuli na makhantseḽara hu tshi katelwa Cllr Patrick Mathidi vha wadi 17 na Cllr Shonisani Cecilia Kwinḓa. Muraḓo wa wadi komiti, Vho Constance Tsaṅwani, vho ṱanganedza vhathu ngei muḓini wa mukegulu Vho Maphaha,
Vha tshi bva mulomo, Vho Meyara vho ṱalutshedza uri: “Ro takuwa u bva hangei ha masipala muhumbulo muhulwane u wa uri ri a laedziwa nga maṅwalo a milayo ya masipala uri tshifhinga tshoṱhe ri tea uya vhathuni. Ri vha ri tshi khou isa dziripoto na u pfa uri kushumele kwashu ku khou vha fara hani. Huna hune vhone vha tea uri ri eletshedza uri ndi hufhio hune a ri khou kandisa zwone, nga u tou ralo. Musi ri tshi khou ita tshivhidzo, vhaofisiri vhashu vha ya vha vho ḓa hafha kha wadi, vha tshimbila u swika na musanda.
“Mukhantseḽara wa wadi na komiti ya wadi vho ranga phanḓa vhaofisiri vha masipala vha tandula hoṱhe, Musi zwo ralo Vho Meyara vho sedza uri ndi nga ngafhi hune a vha na vhudzulo kana vhudzulo vhu hone vhu sa tou sedzea. Sa fhano hune nnḓu ya hone ri khou i sedza nga nnḓa ina mitwe. Ndi ngazwo ro dzhia tsheo heyi ya uri nnḓu ri i sie na Vho Elisa Maphaha vhane vha dzula na muḓuhulu wavho.
Vha tshi isa phanḓa, Vho Meyara vho ri: “Nṋe ndi khou vhona ho nangiwa fhethu ha vhuḓi ngauri mukegulu vha tshila nga mundende lune vha nga si tsha kona uri nnḓu heyi vha i vusuludze zwa vhuḓi. Zwine zwa amba uri musi riṋe ri tshi khou ḓa uri ri vha thuse, ri vha ri thi khou thusa muthu eneene o teaho. Riṋe zwi a mba uri ri ḓo tou fhaṱa iṅwe nnḓu ine Vho Elisa vha ḓo kona u dzula khayo na muḓuhulu wavho.”
Vha tshi fhedza u onesa kha mukegulu, Vho Meyara vho livha tshivhidzoni ngei Lufule 2, he ha thomiwa nga u farwa mutangano na zwiimiswa zwa tshitshavha.
Vha tshi ṋetshedza muvhigo wa politiki, mukhantseḽara wa wadi 17 Vho Patrick Mathidi vho ri: “Heyi wadi ina mivhundu ya malo hu tshi katelwa dzilokhishi ṱhanu na vhupo ha mahayani huraru. Kha miṅwaha miṋa yo fhelaho muvhuso wo kona u ḓisa thandela dzo fhambananaho. Kha dzibada ho itiwa dzikhiḽomitha mbili ngei Lufule 2 na dziṅwe mbili ngei ha Mabunda.
“Kha maḓi ho dzheniswa dzibommbi ngei murahu ha Mbaleni. Zwi tshi kwama vhudzulo ho fhaṱiwa dzinnḓu dza 13. Ho lugiswa na midavhi ya mitambo ngei Ṱhohoyandou G Ext. na Lufule 3. Ho dzheniswa mavhone a zwitaraṱani ngei Makwarela. Ho fhaṱwa dzibiridzhi ngei ha Mavhunda na ha Magidi”.
