IMBIZO YA THULAMELA YO FARELWA MALAVUWE

Vhadzulapo vha Malavuwe fhasi ha Masipala wa Thulamela, Ward 39, vho dzhenela Imbizo ya Meyara Cllr Vho Athongozwiḓivha Sarah Rambuḓa ngei luvhanḓeni lwa Matsika Shooting Stars nga Ḽavhuṱanu, 06 Nyendavhusiku 2024, he vha humbela nḓisedzo ya tshumelo dzo fhambananaho sa maḓi, dzibada, tsireledzo na mishumo.

Nga matsheloni musi tshivhidzo tshi sa athu thoma, makhatseḽara vha Thulamela vho thoma nga u ya musanda ngei Mbilwi u luvha kha Thovhele Gole Mphaphuli.

U bva afho goloi dza mahosi na makhantseḽara dza dubekana dzo livha ngei Malamangwa muṱani wa ha Mareḓa une wo topoliwa sa wa vhashai vhane vha tea fhatelwa nnḓu nga masipala. Vha tshi bva mulomo, Vho Phineas Mareḓa (84) vho livhuwa masipala u vha thusa nga nnḓu ngauri ndi kale vha tshi khou shaya vhudzulo.

Muduba wo mbo takutshedza wa livha Tshikoloni tsha Phuraimari ya Matsika ha farwa muṱangano vhukati ha makhantselara, vhaofisiri vha muvhuso na mahosi nga ha nḓisedzo ya tshumelo kha ḽa Malavuwe.

Khosi Vho Mafenya Mphaphuli vho sumbedzisa uri hu khou ṱahela zwithu zwo vhalaho hu tshi katelwa maḓi, dziburoho na dzibada

Ngei tshivhidzoni kha wadi iyi ya Cllr Avhapfani Khangale, vharangaphanḓa vha zwiimiswa zwa vhadzulapo vho ṋetshedzwa tshikhala tsha u amba zwililo zwavho, vha vhudziwa uri vha tou ṅwala uri zwi kone u ya u sedzuluswa na u dzudzanyiwa kha dziofisi dzo teaho.

Vha tshi fhindula kha zwo ambiwa, Vho Meyara vhori: “Ho ḓa ha ima vhafunzi hafha vho imela Pastors Forum. Ri zwine ra vha zwone nga Pastors Forum ngauri ḓuvha ḽiṅwe na ḽiṅwe vha dzula vha tshi khou ri rabelela vha tshi khou ita uri hune ra vha hone hu vhe na mulalo. Vha khou thusa nga maanḓa kha lushaka. U dovhe u sumbedzise kha vha vhafunzi vhashu na vhaṅwe vha lushaka, vho amba hafha uri badzhete dzi songo tshifitiwa. Arali ro badzheta uri ri khou ḓisa mini fhano hune ra vha hone, kha zwi ḓe hanefha.”

Vha tshi isa phanḓa vhori: “U nga vha sumbedzisa hafha uri sa Thulamela, riṋe musi ri tshi puḽana, vha tshi pfa hu tshi pfi ri khou ita road gravelling ri ita uri ri katale. Arali ri khou ḓisa khiḽomitha mbili kha dziwadi, mukhantseḽara muṅwe na muṅwe u bva kha wadi ya u thoma u swika kha wadi 41, hedzo khiḽomitha mbili u fanela u dzi wana.

“A ri iti zwa uri ri tou nanguludza ngauri vhupo hoṱhe vhu wela Thulamela. Ndi zwa vhukuma vha khou amba zwone, riṋe a ri tou funa uri ri tea vha ṋea tshumelo. Ri tou tea u vha ṋea tshumelo kana i khou tou na na tshifhango. Vho ri vhetshela zwone hafhaḽa ngauri vho tou ri khetha.”