THAMBULO YA MUṰA WA MUKALAHA YO GUMA TSHIVHIDZONI TSHA MAUNGANI

Ho vha hu mupfhufhi u si mphire ngei Tshivhidzoni tsha Maungani kha wadi 18, musi Meyara wa Masipalawapo wa Thulamela, Vho Athongozwiḓivha Sarah Rambuḓa, vho ya nga tsha vhukoma u thetshelesa zwililo zwa vhadzulapo, nga Ḽavhuṱanu, 08 Ṱhafamuhwe 2024.                       

Sa nga nga nzulele, Cllr Rambuḓa vho thoma nga u gonya thavhani u luvha Khosi Vho Masiagwala NW he vha fhelekedzwa nga Tshipikara Vho Muṱheiwana FA khathihi na komiti khulwane ya ha masipala.  Nga murahu ha u ṱanganedzwa shangoni ḽa Maungani, ḽine ḽo vhandekana na ḓorobo ya Ṱhohoyanḓou, tsini na Yunivesithi ya Venḓa, murumba wo mbo ḓi ṱambela tshanḓa.                                               

U bva musanda, muduba wo mbo ḓi livha muṱani wa mukalaha Vho Musiwalwo Joseph Raḽigilinga vha Maungani, Thondoni, vhane ndi mushai ane a dzula nḓuni yo fhaṱwaho nga mavu ya fulelwa nga mahatsi. Vho Raḽigilinga vho tou topoliwa nga tshitshavha uri vho fanelwa nga u fhaṱelwa nnḓu nga muvhuso, uri vha kone khwinisa vhutshilo havho na ha muṱa wavho u katelaho mufumakadzi wavho na vhaḓuhulu.                           

Vha tshi posa maipfhi a ndivhuwo, Vho Raḽigilinga vho ri: “Masipala wo mpfhesesa, zwithu zwanga zwi tou ga zwi ḓo luga. Ndi livhuwa Vho Meyara, mukhantselarawapo na musanda vhaṋe vha mavu.”

Meyara Vho Rambuḓa vho fhulufhedzisa uri Vho Raḽigilinga nnḓu vha ḓo guma vho fhaṱelwa. “Ri fhano Maungani kha ḽa musanda Vho Masiagwala, ro ḓa sa masipala wa Thulamela, ri tshi khou ḓisa tshumelo.”                            

Vho Rambuḓa vho ri: “Musi ri henefha ro ṱangana na muṱa wa Vho Raḽigilinga hune ro wana zwithu zwi songo tou dzulisea zwone hu si na vhudzulo, hune ndi mukalaha na mukegulu wavho na zwiḓuhulu zwavho. Ro wana uri zwo fanela uri ri sie ro vha sumbedzisa uri ri khou ya u vha ḓisela nnḓu, ine ya ḓo shandukisa vhutshilo havho ha vha na u vhonala uri hu na mbonelanṱha. Ro ḓa hafha ri masipala wa Thulamela hu na Vho Muṱheiwana FA vhane vha vha tshipikara, miraḓo ya komiti khulwane, makhantseḽara a dziwadi, Foramu ya Vhafunzi vha Thulamela khathihi na komiti ya African Union. Roṱhe ro takuwa na vhakoma vha fhano Maungani na vhomakhadzi. Ro ḓa u vha dziṱhanzi uri Vho Raḽigilinga  vha kone u wana vhudzulo ha khwine”.      

Musi Vhamusanda vha tshi zwa, Khosi Vho Masiagwala vho ri a vha na mafhungo manzhi, vha tou vha na dakalo ḽihulu.                           

“Zwiṱirakitsha zwoṱhe kha zwi pfhe zwo ṱanganedziwa. Zwine Thulamela vha khou ri itela zwone u bva mahoḽa, ndi zwihulwane ngamaanḓa, Vha khou kona u vhona uri zwisiwana ndi mini nahone vha ya zwi thusa. Ndo ima hafha ndi tshi ri ndo takalesa, a si havha fhedzi ṋanwaha vhane vha khou fhiwa nnḓu.

Ha vha ndi vha vhuraru, zwi tshi khou itiswa nga Vho Meyara na khabinethe yavho na mukhantseḽara wa wadi 18 yashu. Vho no vha hone makhantseḽara fhedzi a hu na o no itaho zwi no fhira zwo no khou itwa nga Cllr Ṋelushi TA”. Mbekanyamushumo yo khunyelela luvhanḓeni lwa Beuster he Vho Meyara, makhantseḽara na vhashumi vha Thulamela vha thetshelesa tshaidzo dza vhadzulapo dzi kwamaho nḓisedzo ya tshumelo ya muvhuso wapo.

MAGUMO