TSHIVHIDZO TSHA DOPENI TSHO LAVHELELWA U KHWINISA NḒISEDZO YA TSHUMELO YA THULAMELA

MUVHIGI WA THIṰAFU 

Sa tshipiḓa tsha tshumelo ya Ṱshumisano ya vhathu ine ya pfhi ‘Imbizo’, Meyara wa masipalawapo wa Thulamela Vho Athongozwiḓivha Sara Rambuḓa vho shumisana na vhadzulapo nga ha khaedu na ndavhalelo ya nḓisedzo na tshumelo kha wadi 27 ngei vhuponi ha Dopeni kha mudavhi wa zwipotswo wa Phuraimari ya Muṱuwafhethu nga Ḽavhuṱanu ḽa 27 ḽa Tshimedzi.

Ndivho khulwane ya madalo ho vha u khwaṱhisa vhushaka na Zwiimiswa zwa vhadzulapo na u fhungudza khaedu dza nḓisedzo ya tshumelo dzine dza khou ṱanganiwa nadzo nga vhadzulapo vha vhupo ha ha Masipala wa Thulamela.

Meyara Vho Rambuḓa khathihi na vhurumelwa havho vhune ha katela makhantselara na vhaṅwe vhashumeli vha muvhuso vhane vha bva ha masipala vho shumisa ḓuvha iḽo nga u dalela, Rabelani Tshikovhi, muholefhali ane a dzula kha nnḓu ya lufhera luthihi, nahone nga murahu ha musi vho sedzulusa nzulele iyo, Vho Rambuḓa vho ḓivhofha u mu fhaṱela nnḓu.

Muimeli wa Dopeni, Shanzha, Tshivhiliḓulu na vhuṅwe vhupo vhu re henefhaḽa tsini kha wadi 27, Mpho Matika o vhudza Meyara wa Thulamela, uri bada dzi si dzavhuḓi, ṱhahelelo ya maḓi na nḓisedzo ya muḓagasi ndi dziṅwe dza dzikhaedu dzine dza tea u dzhielwa nṱha nga u ṱavhanya.

“Ri dzula vhuponi vhu songo bvelelaho nahone ri khou vhilahela nga bada dzi si dzavhuḓi, ṱhahelelo ya maḓi bommbini/phaiphini, nḓisedzo ya muḓagasi kha miṅwe ya mivhundu miswa. Vhugevhenga nahone ho ḓi ṋea maanḓa hafha vhuponi hashu, zwenezwoha ri khou ita bembela kha Vho Meyara uri vha ri itele mavhone malapfhu ane a pfhi “Apollo Lights” ane a ḓo thusa u ḓisa tshedza nga madekwana.” Matika u a amba.

Vhamusanda Vho Pfananani Shavhani vha muvhundu wa Shanzha vho posavho ḽa vhusiwana kha Vho Meyara na vhurumelwa havho, uri vhone sa vharangaphanḓa vha sialala, vha tou vha vhone vho imelaho vhathu vhoṱhe, zwenezwoha vha nga takala vhukuma arali masipala wa Thulamela wa tou fombe kha u shandukisa vhutshilo ha vhathu, u itela tshitshavha tshavhuḓi!

Vho zwa uri vhuhone na u dzhenelela ha vhavhusi vha sialala kha u tshimbidza dziṅwe tshumelo kha muvhusowapo u mona na tshiṱiriki tsha Vhembe, zwi ḓo thusa u ṱavhanyisa nḓisedzo ya tshumelo dza maḓi, bada na muḓagasi.

Musi vha tshi khou ya u vhina na u fhindula mbudziso na u ya phanḓa, Meyara wa Thulamela Vho Athongozwiḓivha Sarah Rambuḓa vho amba uri vho takala uri masipala u khou ṱavhanya vhukuma kha nḓisedzo ya tshumelo na uri, vho wana muvhigo wa u vha ḓivhadza uri u fhaṱiwa ha nnḓu dza 40 dza RDP dze dza vha dzo avhelwa wadi ya 27, thandela dza muḓagasi kha miṅwe mivhundu miswa i khou bvela phanḓa zwavhuḓi nahone zwi ḓo khunyelela hu si kale.

U ya nga ha Vho Rambuḓa, naho nḓisedzo ya maḓi i sa tou vha mushumo wavho sa masipalawapo, vha shuma sa thimu nthihi na masipala wa tshiṱiriki tsha Vhembe nahone vho fulufhedzisa u ḓo isa khaedu dza nḓisedzo ya maḓi kha mivhundu i kwameaho kha wadi 27 ngei kha masipala wa Tshiṱiriki.