THULAMELA VHO ITA MAḒANDA A PFENE VHA FHAṰELA MUFUMAKADZI WA MUSHAI NNḒU

Nga PHUMUDZO wa ha MAKHARAMEDZHA

Mufumakadzi wa mushai we vha tambula miṅwaha minzhi vho guludana na muṱa wavho mitumbani mivhili ya mahatsi, Vho Livhuwani Olive Ṋegondeni, vha miṅwaha ya 45, vha ngei muvhunduni wa Vhurivhuri thungo dza Tshilamba, vha tshi karuwa nga Duvha ḽa Vhafumakadzi lo pembelwaho nga Lavhuraru, 09 Thangule, vho vha vha tshi khou mwemwela ngauri vhutshilo havho ho mbo di khwinifhadzea, vha vho dzula nḓuni ya malege.

Hafha muḓini mapfeṋe o vha o tsitsa vhana ngauri ha vha mme a vhana vhavhili vho vha vha tshe vho takalela uri nga tsha mulovha, nga Ḽavhuvhili, 08 Ṱhangule, muḓini wavho ho vha hu si mupfufhi u si mphire, ho kunguluwa na thavha, Thovhele Vho Gole Mphaphuli, vho fhelekedza Meyara wa Masipala wa Thulamela, Cllr Vho Athongozwiḓivha Sarah Rambuḓa uya ṋekedza Vho Ṋengovhela nnḓu ya kamara nṋa ya malege yo dzheniswaho muḓagasi, vha ingwa nga fanitshara na zwiputo zwa zwiliwa.

Vho Ṋegondeni vho vha vho ḓigeda nḓuni yavho yo no khou di tou nukhelela pennde ye vha fhaṱelwa nga Masipala wa Thulamela wo ita maḓanda a pfeṋe na vhoramabindu vhapo hu tshi katelwa Makopo Holdings, Monate Chicken & Steak na vha Sabina Pharmacy.                                                                                  

Vha tshi bva mulomo, Vho Ṋegondeni vho ri: “Vha masipala ndi khou vha livhuwa nga maanḓa ka heyi tshumelo nngafhangafha ye vha nḓisela yone ngauri nga ndoṱhe ndo vha ndi sa ḓo zwi kona.” Vha tshi ṱalutshedza kudzulele kwavho ngei mitumbani, Vho Ṋegondeni vho ri: “Zwo vha zwi tshi mmbaisa musi mvula dzi tshi na, ngauri nnḓu ye nda vha ndi tshi eḓela khayo yo vha i tshi dzhena maḓi a tshi elela a tshi bva nṱha a tshi ya muṋangoni, ya dovha hafhu ya ṋukala zwidina u mona nayo nga fhasi u swika nṱha. Ndi khou livhuwa mudzulapo we a vha vhona thambulo yanga, Vho Thilivhali Mahada, vha kona u vhudza vha masipala”.